Հեռուստատեսության և ռադիոյի ազգային հանձնաժողովի կողմից Էրոտիկ բնույթի հեռուստահաղորդումների, սարսափ և ակնհայտ բռնություն պարունակող ֆիլմերի, ինչպես նաև անչափահասների առողջության, մտավոր և ֆիզիկական զարգացման, դաստիարակության վրա հնարավոր բացասական ազդեցություն ունեցող հաղորդումների որոշման չափորոշիչներ սահմանելու մասին այսօր խոսել են Հեռուստատեսության և ռադիոյի ազգային հանձնաժողովի փոխնախագահ Ժիրայր Դադասյանը և Աշոտ Բլեյանը:
Ժիրայր Դադասյանն ասաց, որ չափորոշիչները սահմանելու համար լայն քննարկումներ են սկսվել, ակնկալում են նաև առաջարկներ, քանի որ սա ընդամենը դեռևս նախագիծ է:
Ըստ նրա այս չափորոշիչները կյանքի կկոչվեն՝ բացառելու համար «Զանգվածային լրատվական միջոցների մասին», «Հեռուստատեսության և ռադիոյի մասին», «Լեզվի մասին» օրենքների պահանջների խախտումներն էրոտիկ, անբարո, բաց տեսարաններով ու բիրտ ուժ քարոզող առանձին ցածրարժեք ֆիլմերում:
Ժիրայր Դադասյանն ասաց, որ այս չափորոշիչներով չառաջնորդվելու դեպքում Հեռուստատեսության և ռադիոյի հանձնաժողովի կողմից կարող են ստանալ առաջին, երկրորրդ նախազգուշացումը, իսկ երրորդ անգամ ուղղակի կզրկվեն լիցենզիայից: Ըստ նրա պատժի մեխանիզմը հստակ է լինելու :
Աշոտ Բլեյանը սակայն նախագիծը չհամարեց կյանքի կոչվող, ավելին չափորոշիչները համարեց դեկորատիվ փոփոխություններ, որոնք գործելու են ոչ օբյեկտիվորեն և հավասար չեն լինելու բոլոր հեռուստաընկերությունների համար:
«Իրական կյանքը փոխելու փոխարեն, այսօր դեկորատիվ փոփոխություններ են կատարվում: Մենք շարունակում ենք Խորհրդային իրականությունն ամրապնդել: Այս աղմուկը փաստում է, որ հայ հասարակությունը հայտնվել է որոգայթում և մեղավորը «Որոգայթ» սերիալն է: Սակայն ես ուզում եմ արձանագրել, որ «Որոգայթից» առաջ այլ սերիալներ էին`Ա1+-ի փակումն էր, Նիկոլ Փաշինյանի նկատմամբ հաշվեհարդարը, Խաչատուր Սուքիասյանի ունեցվածքի խլումը, ՀԱԿ-ի, իմ և ձեր ազատությունների սահմանափակումը»,- նշեց Բլեյանը
Մարգարիտա Սարգսյան
|
