Լրագողների հետ հանդիպմանը այսօր ԱԺ «Դաշնակցություն» խմբակցության ներկայացուցիչ Արծվիկ Մինասյանը խոսեց ՀՀ կառավարության կողմից ԱԺ ներկայացված հարկային փաթեթի մասին, որով առաջակվում է ավելացնել տեղական հարկերը:
Մեր խմբակցությունը ակտիվ հակադարձում է ցուցաբերում, մասնավորապես փաթեթով առաջարկվող 10 հարկատեսակներին, որոնցից հողի հարկը և գույքի հարկը ներկայում գործում է, սակայն առաջարկվում է, որպեսզի դրանք դառնան համայնքի պարտադիր լիազորություն։
Ապա հավելեց ,- «Մեր առարկությունները բխում են չորս հիմնական ուղղություններից` տնտեսական հիմնավորումներ, սոցիալական հետևանքներ, տարածքային համաչափ զարգացման համատեքստում ազգաբնակչության տիրապետող ռեսուրսների ճիշտ օգտագործում և քաղաքական ուղվածություն: Մեր խորին համոզմամբ` այն տեսքով, ինչ տեսքով որ ներկայացված է այս նախագիծը, չի կարող քաղաքական ենթատեքստ չունենալ: Այս հարկային փոփոխությունները բերելու են սեփականության նոր վերաբաշխման հնարավորության ընձեռման, մյուս կողմից ավելացնելու են անբարեխիղճ համայնքի ղեկավարների դիրքերը և թուլացնելու են բարեխիղճներինը»:
Այնուհետև խոսելով գազի սակագնի բարձրացման մասին նշեց, որ դա բերելու է գնաճային նոր ճնշման , որի դիմաց Կենտրոնական բանկը սկսելու է դրամի առաջարկը կրճատել , ինչը լրացուցիչ նոր ճնշում է լինելու դրամական, ապրանքային շուկայի վրա:
«Ես կարծում եմ, որ քաղաքացիներն այդ մասով առնվազն ակտիվ պայքարի մեջ պետք է լինեն, մենք էլ սոցիալ-տնտեսական քաղաքականության ծրագրի շրջանակներում պատրաստ ենք աջակցել այդ ակտիվությանը: Այսինքն` պահանջներ պետք է դրվեն և գազի որակի, և վճարունակության մասով»,- ասաց պատգամավորը:
Ընդդիմադիր պատգամավորը 2010թ. բյուջեով նախատեսված 1.2 տոկոսանոց տնտեսական աճի կանխատեսումը համարեց անիրատեսական և ոչ արդյունավետ քաղաքականություն:
«Այդ կանխատեսման տակ չկան լուրջ հիմնավորումներ: Կանխատեսումը նաև խոստում է, սակայն այդ խոստումը կառավարությունը վաղուց խախտել է. 2009թ. կանխատեսվող տնտեսական աճի դիմաց ունեցանք 180 տոկոսով շեղված իրավիճակ»,- նշեց Մինասյանը:
Մարգարիտա Սարգսյան
|
